Մարտի 25-ին ՀՀ ԱԻՆ Փրկարար ծառայության Շիրակի մարզային փրկարարական վարչության Ամասիայի հրշեջ-փրկարարական ջոկատը արտակարգ իրավիճակներում արձագանքման գործողությունների պատրաստվածության մակարդակի բարձրացման նպատակով անցկացրեց ցուցադրական հատուկ տակտիկական ուսումնավարժություն Ամասիայի արհեստագործական պետական ուսումնարանում։

Տարածաշրջանը գտնվում է հնարավոր երկրաշարժերի գոտում, ուստի նմանատիպ միջոցառումները խիստ անհրաժեշտ են:

Ուսումնական վարժանքի տեսական հատվածում ուսանողների հետ քննարկվեց, թե ինչ պետք է անել հրդեհի կամ երկրաշարժի ժամանակ։

Հանդիպման գործնական հատվածում ուսումնարանի ազդարարման համակարգի միջոցներով տրվեց ազդանշան և հնչեց տարհանման հրահանգ և կազմակերպվեց ուսանողների տարհանումը:

Ուսումնարանի տնօրեն Մարգուշ Ղազարյանի փոխանցմամբ՝ նման միջոցառումները միայն անհրաժեշտություն են, քանի որ վրահաս աղետի ժամանակ մեծ նշանակություն ունեն առաջին րոպեներին արված ճիշտ գործողությունները:

Հանդիպման ավարտին ջոկատի աշխատակիցները ամփոփեցին վարժանքի արդյունքերը՝ մատնանշելով գործողություների թերություններն ու բացթողումները։